'യുദ്ധം വരുന്നു, പണം വാരൂ…'; കിയോസാക്കിയുടെ ഉപദേശം വിവാദത്തിൽ

ലോകം യുദ്ധഭീതിയിൽ വിറങ്ങലിച്ചു നിൽക്കുമ്പോൾ, വരാനിരിക്കുന്നത് സമ്പാദിക്കാനുള്ള സുവർണാവസരമാണെന്ന പ്രസ്താവനയുമായി സാമ്പത്തിക വിദഗ്ധനും പ്രശസ്ത എഴുത്തുകാരനുമായ റോബർട്ട് കിയോസാക്കി. "യുദ്ധം ലാഭകരമാണ്, ഇനി അതിസമ്പന്നരാകാനുള്ള സമയമാണ്" -കിയോസാക്കിയുടെ ഈ വാക്കുകൾ വൻ ചർച്ചകൾക്ക് വഴിതുറന്നിരിക്കുകയാണ്.

യുദ്ധങ്ങൾ ലോകത്തിന് ദുരിതമാണെങ്കിലും സാമ്പത്തിക നിക്ഷേപകർക്ക് അത് വലിയ അവസരമാണെന്ന് കിയോസാക്കി വിശ്വസിക്കുന്നു. ചരിത്രപരമായി വലിയ സംഘർഷങ്ങളുടെ സമയത്ത് ചില പ്രത്യേക ആസ്തികളുടെ വില കുതിച്ചുയരാറുണ്ട്. ഈ മാറ്റം മുൻകൂട്ടി കണ്ട് നിക്ഷേപം നടത്തുന്നവർക്ക് വൻ ലാഭം കൊയ്യാമെന്നാണ് കിയോസാക്കി പറയുന്നത്.

എവിടെ നിക്ഷേപിക്കണം?

സുരക്ഷിത നിക്ഷേപമായി ലോകം എപ്പോഴും കാണുന്നത് സ്വർണത്തെയാണ്. യുദ്ധസമയത്ത് ഇതിൻ്റെ വില കുതിച്ചുയരും. 'ഡിജിറ്റൽ ഗോൾഡ്' എന്ന് വിശേഷിപ്പിക്കപ്പെടുന്ന ബിറ്റ്‌കോയിൻ വരുംകാലത്ത് കരുത്താർജിക്കുമെന്ന് അദ്ദേഹം പ്രവചിക്കുന്നു. യുദ്ധം കൊടുമ്പിരിക്കൊള്ളുമ്പോൾ ആയുധങ്ങൾക്കും പ്രതിരോധ സംവിധാനങ്ങൾക്കും ഡിമാൻഡ് കൂടും. ഈ മേഖലയിലെ കമ്പനികളുടെ ഓഹരികൾ ലാഭകരമാകും.

വിമർശനവും ആശങ്കയും

മനുഷ്യജീവന് വില കൽപിക്കാതെ യുദ്ധത്തെ ലാഭക്കണ്ണിലൂടെ നോക്കിക്കാണുന്ന കിയോസാക്കിയുടെ നിലപാടിനെതിരെ സമൂഹ മാധ്യമങ്ങളിൽ വലിയ പ്രതിഷേധം ഉയരുന്നുണ്ട്. എന്നാൽ, വിപണിയിലെ യാഥാർഥ്യമാണ് താൻ പറയുന്നതെന്നാണ് കിയോസാക്കിയുടെ വാദം. ലോകം വലിയ സാമ്പത്തിക തകർച്ചയിലേക്ക് നീങ്ങുമ്പോൾ അതിൽനിന്ന് രക്ഷപ്പെടാൻ ഇപ്പോൾ തന്നെ തയ്യാറെടുക്കണമെന്നും അദ്ദേഹം മുന്നറിയിപ്പ് നൽകുന്നു.

യുദ്ധം വിതയ്ക്കുന്ന നാശത്തിനിടയിലും പണം വളർത്താനുള്ള വഴികൾ തേടണമെന്ന കിയോസാക്കിയുടെ ക്രൂരമായ ഉപദേശം നിക്ഷേപകർക്കിടയിൽ ചേരിതിരിവുണ്ടാക്കിയിരിക്കുകയാണ്. ലോകം സമാധാനത്തിന് വേണ്ടി പ്രാർഥിക്കുമ്പോൾ, ലാഭക്കണക്കുകൾ നിരത്തുന്ന കിയോസാക്കിയുടെ തത്വശാസ്ത്രം മാനവികതയ്ക്ക് നിരക്കുന്നതാണോ എന്ന ചോദ്യം പ്രസക്തമാണ്.

Content Highlights: War is profitable, time to get richer: 'Rich Dad Poor Dad' author Robert Kiyosaki